Kommentare oor die boek

Lodie, Ek't jou boek die naweek in twee dae deurgelees- ek kon dit net nie los nie!!

Hi Lodie Jou boek was fantasties. ek kan nie wag vir die volgende reis asook die boek daaroor nie. Ek wil graag weet of jy die boek sal teken as ek na Naboom toe ry, en vir jou kom dagsê oor 'n naweek.

Hi Lodie! Ons het al vantevore met mekaar gepraat. Ons het ook die reis van Kaapstad na Londen gedoen in 2007/2008. Ek het jou boek toe gekoop en ek moet sê dit was baie goed, ek het soms 'n traan in die oog gekry....en ook baie lekke gelag. Wat vir my ongelooflik was om soms my oë toe te maak en dan sien ek presies die plekke, mense en paaie in my geestesoog! Hel dis darem 'n ding wat 'n mens nie sal vergeet nie.... Dit sal vir my lekker wees as ons in kontak kan bly . Ek sien jy het ander reisigers se blog site op jou webtuiste, as jy wil kan jy ons s'n ook aanheg, www.x-ingafrica.com Voorspoed met al jou beplanninge!

Hi Lodie, ek is besig om jou boek Noord van Naboom te lees. Ek is 'n biker en bike racer, het 'n besigheid hier in Pretoria. Ek is ook mal oor reis. Ek het al 'n paar oorsese trips gehad waar ek net my begin en vlug terug beplan het. Die tyd tussen in hitch hike ek soos die wind waai. Lekker en onbeplan. Ek lees nie graag Afrikaanse boeke nie, seker omdat dit so stadig gaan. Ek geniet jou stories en relate met jou. Hou so aan en geniet dit. Ek wil een of ander tyd 'n bike toer in Noorweë doen, amazing land. Ek hou ook dagboek met my toere en doen ook so paar sketse. Sit asb meer fotos in jou volgende boek.

Vandag sit ek hier met baie gemengde gevoelens. Ek het met opset nie die boek gelees terwyl ek by die huis was nie. Ek het myself uitgehonger en ek het vasgebyt todat ek kon gaan sit en lees sonder onderbreking. Ek het Saterdagaand begin en ek het hom gisteraand klaar gemaak. Dit was moeilik om hom neer te sit. As my oë nie Saterdagaand vanself toegeval het nie, sou ek seker regdeur gelees het. Ek was 4:30 Sondagoggend wakker met die boek in my kop.

Man ek het lanklaas op so lekker emosionele trippie gegaan. Jy het my op ‘n virtuele toer deur Afrika gevat wat ek nie maklik sal vergeet nie. Dit het partykeer vir my gevoel asof ek saam met jou daar is. Ek het keer op keer myself en my fiets in daardie situasies voorgestel. Ek het my vrou op haar fiets gesien en gewonder hoe sy dit sou hanteer. Ek dink as iemand my dopgehou het terwyl ek gelees het, sou hulle gewonder het wat aangaan. Partykeer het ek geglimlag, partykeer hardop gelag, partykeer erg gefrons en selfs so nou en dan ‘n traan gepik.

Meeste van dit wat jy daar beskryf het, het ek al hier in Angola ondervind. Dit wil vir my amper lyk asof Afrika noord van Naboom maar baie dieselfde is. Al verskil is die lande se name. Die armoede, die mense se optrede ens. Hier en daar het die witman se teenwoordigheid ‘n groter impak gemaak as op ander plekke.

Ja, en ek het ook al verskeie kere die Here se hand ervaar terwyl ek en my vrou met die fietsgery het. Ek kan getuig van ‘n paar kere wat Hy ons uit die kloue van die dood gepluk het. My gebed wanneer ons ry is eenvoudig: “Here, vat U die stange asseblief” en Hy weet wat om te doen………

Baie dankie vir ‘n wonderlike ervaring. Ek kan jou verseker, die boek sal meer as eenkeer gelees word en die DVD sal meer as eenkeer gekyk word. Ek wil die ervaring nie vergeet nie.

Ek het gisteraand vir Veronica gesê dat ek wil opry Naboom toe. Ek wil jou jou hand skud en jou in die vlees ontmoet. Ek weet nie wanneer nie, maar soos met Sid en die ander wat jou pad gekruis het, sal ek ook eendag jou pad wil kruis

Baie dankie nogmaals en sterkte met die beplanning vir Namoom na Vladivostok . Ek sal jou dophou sover my uitdagende internet konneksie my toelaat en jy sal in my gebede wees.

Beste Lodie

Voor ek begin om te vertel hoeveel ek jou boek geniet het, moet ek darem eers sê hoe ek aan die boek gekom het. My man, Malan le Roux, het die boek op aanbeveling van ’n vriend direk by jou gekoop en met groot opgewondenheid by die huis aangekom die dag toe hy die boek in die pos ontvang het. Ons kon nie gou genoeg die DVD-speler aan die gang kry om te hoor waaroor alles gaan nie. Dit gedoen, was die nuuskierigheid natuurlik geprikkel en kon ons nie gou genoeg die ander take afhandel voor die lekker lees begin nie.

Malan het dit begin lees, maar met sy leesspoed het my geduld dit nie uitgehou nie en ek het vir hom ’n ander boek gegee waarmee hy homself tydelik kon besig hou terwyl ek joune woord vir woord opslurp. Ek wil jou komplimenteer met jou skryfstyl – jou boek lees baie lekker. Wat ek baie waardeer het, is dat jy jouself nie spaar met die emosionele dinge nie. Dit maak die boek soveel meer menslik en realisties omdat ek dink dis onmoontlik om die hele tyd in hierdie euforie van opwinding en geluk en voorspoed voort te gaan.

Ons het Long way Round en Long way Down beide gekyk en dit het natuurlik vir die nodige agtergrond gesorg sodat ek jou boek selfs nog meer geniet het. Ek haal my hoed vir jou af dat jy die moed aan die dag gelê het om die tog alleen aan te pak. Ewan en Charley het ’n hele span gehad wat hulle ondersteun het plus nog ondersteuningsvoertuie en baie geld. Dit maak natuurlik ’n groot verskil. Ek dink jou tog was dalk net meer avontuurlik omdat daar die hele tyd ’n spanningsdraadjie deurgeloop het oor alles wat moontlik kan verkeerd gaan – veral as jy alleen in die woestyn is. Ek dink dis wonderlik dat jou enigste moeilikheid die hooflig se sekering was. Die omry deur die taxi was seker nogal ’n skok gewees?

Wat my deurgaans deur jou boek opgeval het, was die groot hoeveelheid vriende waarvan jy nie net melding maak nie, maar wat jou ook op dele van die toer vergesel het. Ek dink dit wil gedoen wees – veral vir mense wat nie van Suid-Afrika is nie. Ek wens ek het vroeër van jou en die toer geweet sodat ek dit ook op die internet kon volg, maar ek sien daar is darem ’n toer na Siberië waarna ons kan uitsien. Ek sou graag op jou poslys wil beland om te hoor hoe dit gaan.

Daar is sóveel goed in jou boek wat trane in my oë gebring het, dat ek my net kan indink hoe jy dit eerstehands moes beleef het. Ek dink die meeste van ons het vooropgestelde idees oor hoe dit in Afrika moet wees – soveel so dat mens hulle amper byvoorbaat behandel volgens die persepsie wat jy het. Ek is baie dankbaar dat jy daardie persepsie vir ons kon regstel – ek was absoluut verstom oor die gasvryheid en opregtheid wat jy van die mense van Afrika ervaar het. Dis so totaal anders as wat ons dink en waarvan ons hoor. Ek het, na die hele ‘reis’ saam met jou deur Afrika, saamgevoel omdat Europa niks vir jou gedoen het nie. Dalk was dit omdat ons maar amper net soos die Europeërs is en dat hulle ook al so ver ontwikkeld is, dat gewone, alledaagse vriendelikheid, belangstelling en gasvryheid nie meer saak maak nie. Is ons nie ook maar so nie? Het ons lewens nie só besig geword dat ons kwalik meer tyd het om vir ander mense die lewe lekker te maak nie? Draai alles nie maar net só om onsself en ons eie klein w*reldjies dat mens nie meer die tyd en moeite ontsien om uit te reik na ander nie? Jy het heelwat van hierdie vrae vir my so mooi beantwoord.

Ek kan nogal dink dat mens baie vreemde goed moet teëkom en vreemde ervarings moet hê, maar ek is baie bly dat ek nie die ervaring van die toiletgat met jou kan deel nie ... Ai, ek dink dis darem iets om gewoond te raak! Ek het ook heerlik gegiggel vir die aand wat jy die klein kamertjie gehad het en toe jou vloer oorstroom toe jy die wasbak se prop uittrek! Wil mens nie dan sommer so bietjie aan die lag gaan oor die hele situasie nie? Dalk by nabaat as mens daarna terugkyk, maar verseker nie terwyl alles besig is om nat te word nie.

Dit was vir baie lekker om te lees hoe jy die gasvryheid van die mense waardeer het wat jou bederf het met tee teen die plaaslike prys, mense wat hulle vriende se woonstelportaal aanbied om jou motorfiets te laat staan, iemand wat sy bed vir jou opoffer ... Ai, dit laat mens weer goed voel oor die mensdom.

Andrea Fourie, Kaapstad

Ek is besig om die laaste deel van die boek te lees. Ek wil hê die boek moet aanhou.

Jou Afrika ervaringe maak dat ek gerus wil wees waar ek nou in die Kaap bly en baie alleen stap. Tog het ek die stemmetjie in my agterkop wat al baie jare daar sit en sê: " Wees versigtig. Loop draaie om vreemdelinge." Hoe meer ek die boek lees hoe meer dink ek ek moet ophou om so bang te wees, ek laat interessante mense en geleenthede deur my vingers glip.

Dit is net na 1 in die oggend en ek het nou net die laaste bladsy van Noord van Naboom gelees. Baie dankie vir die voorreg! Later vandag sal ook ook met ander oë na die vrou uit Afrka kyk wat met haar patroontjies van henna op haar voete en die geverfde henna naels op my ondersoekbed lê. Ek hoop jy sien met jou volgende toer na Rusland die Ambervertrek in sy geheel.

Ek het die boek en dvd vir Francois ontvang. Baie dankie vir jou moeite! Francois was in ekstase. Hy het ook 'n nou n KLR (saam met 'n BMW 1200).

Ek het ook die dvd gekyk. Apart van die bikery, was die ervarings wat jy opgedoen het, ongelooflik.

I finished reading your book yesterday. I have to compliment you on a job exceptionally well done. I am English speaking, but found the conversational style Afrikaans used in this book very easy to read, especially since I have not read an Afrikaans book for many years. It felt like you were relaying the story around the campfire. Although the story was about international travel, the story was clearly being told by a South African.

Ditsem, sê ek nou (ek dink nie spelling is lekker nie, ma jy weet wat ek bedoel) Ek hoop dat, na die Russiese ekskursie daar nog n boek sal wees. Jy moet dit asb in gedagte hou want dit was een van die lekkerste persente wat ek nog kon gee.

Ek het die boek die naweek klaar gelees ... baie geniet ... en my baie laat dink oor mense en ons land en sommer baie dinge!! Dankie!

Skoon vanoggend vroeg JOU boek nader getrek pleks van my Pa s'n... sjame, ek dink Hy het lekker gesmile vir my want Hy ken my mos beter as ekself... Hy weet eks sommer net behoorlik uitgehonger vir avontuur! So nou leef ek maar joune so met jou boek saam

Ek het gisteraand die laaste 3 hoofstukke klaar gelees. Ek het dit stadig gelees omdat ek nie wou
hê dit moes te gou klaar raak nie. Dit is 'n heerlike ervaring om jou boek te kon lees, veral omdat
dit so gemaklik deur die gedagtes gly en dit voel asof mens ingesuig raak en dinge deur die skrywer se
oë sien en ervaar. Dit het gevoel asof ek soms self daar was en ook Letland se grond tussen my vingers kon voel. Wat dit baie spesiaal maak, is die feit dat dit iemand se ware ervaring is wat omskryf word en nie maar net 'n fiksie wat êrens opgedroom is nie.

Dit is 'n boek wat binne in mens dinge wakker maak en jou laat dink oor die ware doel en kwaliteit van die lewe. Ek het baie keer die blaaie eers laat sak en vêr gedink - - - - - dit was soms amper ontstellend om te dink mens moet jou gemaksones prysgee om jou lewensdrome waar te maak. Daar is 'n "inner calling" wat deur die boek wakker gemaak word en ek is seker dat vele mense wat dit gaan lees, hul lewens gaan verander.

Fanie Viviers, Durbanville

Net so ou staaltjie. My vrou vra my gisteraand, terwyl on ge-Skype het, hoekom ek nou die boek vir my vriend gekoop het, want hy het dan nie meer ‘n fiets nie. Toe vertel ek haar maar van die kommentaar wat mense gelewer het oor lewenslesse wat hulle daaruit gekry het en dat meeste mense sê dat hulle dit nie kon neersit nie. Ek vra haar toe om die pakkie oop te maak en vir my die voorwoord te lees want iemand het daarop ook kommentaar gelewer.

Nou ja, om ’n lang storie kort te maak… Toe sy my soos gewoonlik vanmiddag bel om te gesels, vertel sy my dat sy die boek nou al halfpad klaar gelees het. Sy sê dis waar! Mens kan nie die boek neersit as jy eers begin het nie.

Die ander ding wat nou natuurlik weer sy kop uitsteek, is dat sy nou weer begin skimp vir haar eie fiets so, nou weet ek nie so lekker of dit ‘n goeie idee was of nie.

Ek sal nietemin, maar my eie kommentaar lewer wanneer ek eendag die geleentheid het om die boek te lees. Na aanleiding van haar kommentaar en die van ander mense, sit ek nou in afwagting en wag om huis toe te gaan.

"The book and stone have arrived! We love the book, I was able to read a little even though my Dutch is quite poor and my Afrikaans almost non-existent. I know a few South Africans to whom I might show it. I'll also see if my parents are able to read Afrikaans since their Dutch is better than mine. We know how difficult it must be to write a book simply based on how tough it can be to write for our website. And the stone? Well, that is going with our prized collection of souvenirs"

Pierre Bezuidenhout, Mosselbaai:

Dagsê Lodie

Ek het jou boek klaar gelees, en dit was wonderlik om die ervarings op die manier te kan deel. Ek glo nie die woorde kan altyd reg laat geskied aan die oomblik nie, maar jy het dit goed gedoen.

Bettina Grachtrup, Duitsland

Ich habe das Buch schon heute bekommen! Vielen Dank. Ich denke, wenn ich mich jetzt Wort für Wort durch die Zeilen kämpfe, dann kann ich am Ende bestimmt fließend Afrikaans! Ich denke, das Vorwort hab ich schon verstanden.

Bradley Timm, Cape Town

Thought I would just drop you a line to say how much I enjoyed your book – I finished reading it last night. I can just imagine how you must have felt there near the end when you just did not want the trip end.

One thing that really stood out about your book was your honesty about what you saw, how you felt and experienced things and more specifically, how you experienced the people you came into contact with. I think we so often think that people should want and aspire to what we see in the “First World” – and yet for the most part, all people want is to be left in peace and live their lives as they have done for centuries!

My heart was especially touched by the seeming indifference (by certain individuals) that you experienced when you got back. Like you say, don’t they realize where you and the KLR have been! I know that if I had been there, I would have been in awe!

All the best, and let it be known when you are in town (Cape Town) again.

God Bless

Estelle Roos, Welkom

Ek het so pas Noord van Naboom se laaste sin gelees. Ek het lekker gelees. Die vrede en kalmte wat jou reis jou gebring het, het onbewustelik in my oorgespoel! Viva Afrika! Prys die Heer!

Keat from Naboomspruit:

Your book kept me up way past my bed time last night.

Wilmarié Böning, Bloemfontein:

Wow... Na 'n lang kwartaal waar die swottings sy tol geëis het, gaan sit ek salig met jou boek (Noord van Naboom) agteroor om die ruswekie af te skop. Min het ek geweet hoe baie die boek ook vir my siel sou beteken! Met hierdie e-pos wil ek graag vir jou dankie sê (sonder om té melodramaties te raak...) vir die invloed wat jy, miskien heel onwetend, tot dusver in my lewe gehad het.

Nou lees ek jou boek en sien Afrika die eerste keer anders as wat die media dit altyd voorstel. Op 28 November 2009 begin my tog na Afrika van Naboomspruit. Nie naastenby so uitdagend en alleen soos jou tog nie, maar dis my eerste babatreetjie! Ek gaan as deel van 'n groep van 25 studente op 'n uitreik na Zimbabwe, Zambië, Malawi, Mosambiek en Botswana. Vir iemand wat nog altyd versigtig was vir donker Afrika, is jy een van die mense wat hierdie jaar deur Hom wat almagtig is, oor my pad gestuur is om my gerus te stel en opgewonde te maak. Ek verwonder my aan die manier hoe jy Sy beskerming deur jou reise ervaar het! Ek besef net weer opnuut hoe ons elke dag probeer om ons eie plannetjies te maak, maar dat ons net in afhanklikheid van God moet leef. Iets wat my nogal goed getref het toe jy op heel alleenste deur die woestyn moes worstel!

Dankie vir die talle lewenslesse wat jy moes ervaar sodat ander daarvan kan leer. Jou inisiatief, waagmoed en deursettingsvermoë is goeie eienskappe wat vir vele 'n voorbeeld kan wees!

Ek wonder sommer of jy planne vir 2010 in die pyplyn het? As jy 'n Suid-Afrikaner met 'n (nou meer verroeste) Duitse kennis in Bloemfontein as agent benodig, laat weet my gerus!

Mag al jou werk en planne vir die toekoms geseën wees!

Wilmarié Böning ('n oud-uitruilstudent en "fan" van naboom2germany)

Niekie Pelser, Sasolburg:

Ek is besig om jou boek te lees. Man, dit is lekker lees. Ek geniet en wens ek het meer tyd gehad.

Hi Lodie. Net om te sê dat ek jou boek gelees en dit vreeslik geniet het, baie uit jou vertellinge kon leer om toe te pas in my eie lewe. Ek was in Augustus vir 'n paar weke na my dogter in Engeland, ons 2 bietjie in Amerika getoer. Met my terugkeer by die werk het my baas die boek bestel gehad en op my lessenaar gelos sodat ek dit eerste kon lees! Hy weet dat ek jou tog deur Afrika gevolg het, ek het gereeld oor jou vordering aan hom verslag gedoen. Nou het ek dit aan hom oorhandig om te lees.

Andrew Wakefield, White River

Hi Lodie,

I received your book yesterday, have started reading, was supposed to save it for my bedtime companion on my India trip.Couldn’t wait,ha,ha.

Freddie Coetzee - Die e-pos het my sprakeloos gehad. Baie dankie Freddie!

Ek het jou boek baie geniet. Juis omdat dat dit nie net ‘n reisiger gids is nie maar jy met heel ander oë na alles gekyk het en nogal baie van jouself gegee het met die skrywe van die boek.

Ek het ‘n houtskool skets gedoen met die titel “Faith” en die simboliek daarin laat my baie dink aan hoe jy Afrika en sy mense beleef het, al het ek die skets gedoen nog voor ek die boek gelees het. Jy sal dalk ander simboliek daar insien maar dalk is dit vanpas.

Jou boek het my so baie geraak dat, as jy van die skets hou, ek dit graag aan jou wil skenk. Ek besef dat dit dalk nie jou smaak is nie en jy is vry om dit nie te vat as jy dit nie wil hê nie!

Anoniem (ek het belowe om nie die naam by te sit nie)

Ek het my boek vandag by die poskantoor gaan afhaal. Dit was baie vinnig want ek het die 19e van Grafitti gehoor dat hulle die boek gepos het. Vir 'n keer het die poskantoor hulle kant gebring.

Dit lyk na 'n baie interessante boek en ek brand om dit te begin lees maar my man gaan my nek omdraai as ek dit nou doen. Hy is op die oomblik in Amerika en dit veroorsaak dat ek nie nou die boek kan lees nie. Jy sal seker vra watter gek rede dit is maar die saak staan so. My man is baie lui om te lees en daar is soveel kere wat ek op 'n interessante boek afkom wat ek baie graag wil hê dat hy dit ook moet lees, maar pure verniet. Toe het ek begin om die boeke vir hom voor te lees en dit het nou 'n baie lekker "ons-tydjie" geword. Ek lees vir hom as ons ry of as hy in die bad lê of sommer as hy na werk 'n bietjie op die bed lê en rus. Ons het o.a. al Riaan Manser se boek verslind en is op die oomblik besig om Kobie Kruger se "Mahlangeni" klaar te maak. Verstaan jy nou hoekom ek nie stilletjies jou boek kan begin lees nie? Ek kan darem al na die foto's kyk. Dis soos 'n stukkie sjokolade wat 'n mens in die kas toesluit om later suig-suig te geniet.